بيجنگ: چيني سائنسدانن دنيا جو طاقتور ترين چقمق يعني مقناطيس تيار ڪري ورتو آهي. هن سپر ڪنڊڪٽنگ ميگنيٽ دنيا ۾ نئون ريڪارڊ قائم ڪيو آهي. 35.1 ٽسلا جو هي چقمق زمين جي مقناطيسي ميدان کان لڳ ڀڳ 7 لک ڀيرا وڌيڪ طاقتور آهي. هن نئين ايجاد سان ايرو اسپيس، انرجي، ميڊيڪل ۽ تيز ترين ريل گاڏيون هلائڻ وارن شعبن ۾ وڌيڪ بهتري ۽ تيزي انيدي. ماهرن جو چوڻ آهي ته هن ترقيءَ جو فائدو انهن سڀني شعبي ۾ ٿي سگهي ٿو جتي انتهائي طاقتور ميگنيٽ گهربل هوندا آهن، جهڙوڪ ايئروسپيس اليڪٽرومئگنيٽڪ پروپلشن، پاور ٽرانسميشن، ايم آر آءِ (MRI)، نيوڪليئر فيوژن، ۽ سپر ڪنڊڪٽنگ ميگنيٽڪ ليوٽيشن (Maglev) شامل آهن. چائنيز اڪيڊمي آف سائنسز (CAS) جي انسٽيٽيوٽ آف پلازما فزڪس جي محققن جو تيار ڪيل هي مڪمل سپر ڪنڊڪٽنگ ميگنيٽ 30 منٽن تائين لڳاتار استحڪام سان هلندو رهيو، جنهن کي بعد ۾ محفوظ نموني ڊيميگنيٽائيز ڪيو ويو. ٽسلا (T) مقناطيسي فليڪس ڊينسٽي يا مقناطيسي ميدان جي طاقت جو عالمي يونٽ آهي. زمين جو مقناطيسي ميدان لڳ ڀڳ 0.00005T آهي، جڏهن ته ايم آر آءِ مشين ۾ سپر ڪنڊڪٽنگ ميگنيٽ لڳ ڀڳ 3T هوندو آهي. تحقيقي ٽيم ۾ هيفئي انٽرنيشنل اپلائيڊ سپر ڪنڊڪٽوٽي سينٽر، هيفئي ڪمپريهينسيو نيشنل سائنس سينٽر جي انرجي ريسرچ انسٽيٽيوٽ ۽ تسنگهوا يونيورسٽي جا ماهر شامل هئا. هي نئون ريڪارڊ مڪمل سپر ڪنڊڪٽنگ ميگنيٽ لاءِ قائم ٿيو، جيڪو ٻين قسمن جي ميگنيٽن تي فائدا رکي ٿو، جهڙوڪ وڌيڪ استحڪام ۽ برقي توانائي جي گهٽ کان گهٽ ضايع ٿيڻ. ٽيم جو هي ميگنيٽ، جيڪو سپر ڪنڊڪٽنگ مواد مان تيار ڪيو ويو، اڳوڻو ريڪارڊ ٽوڙي ڇڏيو جيڪو 2019 ۾ 32.35T هو۔ اهو ريڪارڊ به CAS انسٽيٽيوٽ آف اليڪٽرڪل انجنيئرنگ ۽ يونيورسٽي آف چائنيز اڪيڊمي آف سائنسز قائم ڪيو هو، جنهن جو ميگنيٽ بيجنگ ۾ قائم Synergetic Extreme Condition User Facility ۾ استعمال ٿيو، جتي مادي جي انتهائي حالتن ۾ مطالعو ٿيندو آهي. ان کان اڳ، آمريڪي نيشنل هاءِ ميگنيٽڪ فيلڊ ليبارٽري 2017 ۾ 32T تائين پهچڻ وارو ميگنيٽ تيار ڪيو هو. CAS موجب گهٽ-گرمي پد وارا سپر ڪنڊڪٽنگ ميگنيٽ لڳ ڀڳ 23T تائين مقناطيسي ميدان پيدا ڪري سگهن ٿا، جنهن تي MRI جهڙي ٽيڪنالاجي ترقي ڪئي. وڌيڪ طاقت حاصل ڪرڻ لاءِ، محققن گهٽ-گرمي پد ميگنيٽن کي اعليٰ گرمي پد وارن سان گڏايو، ته جيئن ميدان وڌيڪ وڌائي سگهجي. تازو ريڪارڊ ٺاهڻ لاءِ، چيني ٽيم هڪ اعليٰ گرمي پد سپر ڪنڊڪٽنگ ميگنيٽ کي گهٽ-گرمي پد واري ميگنيٽ جي مرڪز ۾ رکيو. هي ڪاميابي ميڪانيڪي استحڪام ۽ برقي مقناطيسي ڪارڪردگي کي بهتر بڻائڻ سان ممڪن ٿي، جڏهن ته دٻاءُ جي ورڇ ۽ گھڻن ميگنيٽڪ فيلڊز جي گڏجڻ جهڙين مشڪلاتن تي قابو پاتو ويو. اهو ڪارنامو فيوژن ميگنيٽ سسٽمز جهڙن جديد شعبن ۾ فني سهائتا فراهم ڪندو ۽ اوزارن جي واپاري استعمال ۾ به مددگار ٿيندو، جهڙوڪ نيوڪليئر ميگنيٽڪ ريزوننس اسپيڪٽرو ميٽرز، جيڪي مادن جي ماليڪيولر ڍانچي جو جائزو وٺن ٿا. انسٽيٽيوٽ آف پلازما فزڪس چين جو مکيه ادارو آهي، جيڪو انٽرنيشنل ٿرمو نيوڪليئر ايڪسپرمنٽل ريئڪٽر (ITER) ۾ چين جي حصي تي ڪم ڪري رهيو آهي. هي هڪ عالمي نيوڪليئر فيوژن پروجيڪٽ، جيڪو سج جهڙي عمل ذريعي توانائي پيدا ڪرڻ جو مقصد رکي ٿو. نيوڪليئر پاور پلانٽن ۾ فشن ذريعي توانائي پيدا ٿئي ٿي، جتي ڳري ايٽم کي ٻن حصن ۾ ورهايو وڃي ٿو، جڏهن ته نيوڪليئر فيوژن ۾ ٻه هلڪا ايٽم گڏجي توانائي پيدا ڪن ٿا. پوري دنيا جا ملڪ ڪمرشل نيوڪليئر فيوژن کي ترقي ڏيڻ چاهين ٿا، ڇو ته اها لڳ ڀڳ لامحدود توانائي جو ذريعو بڻجي سگهي ٿي، جنهن لاءِ ريڊيو ايڪٽو مواد تي ڀاڙڻو نه پوندو. هن انسٽيٽيوٽ هيفئي (صوبو آنهوي، چين) ۾ ڪمپري هينسيو ريسرچ فيسليٽي فار فيوژن ٽيڪنالاجي تعمير ڪرڻ ۾ مدد ڪئي، جتي انجنيئرز فيوژن ريئڪٽرز جا اهم حصا ڊزائين ۽ جاچ ڪري سگهن ٿا.
