ڪراچي: سنڌ هاءِ ڪورٽ پنهنجي حڪم ۾ چيو آهي ته صوبائي ۽ وفاقي حڪومتون يقيني بڻائين ته قومي اتحاد کي نقصان نه پهچي، عدالتي حڪم موجب سنڌ مان هڪ وفاقي ميمبر کي ارسا ۾ مقرر ڪيو وڃي، جيڪڏهن ضروري هجي ته هن مسئلي کي مستقل بنيادن تي حل ڪرڻ لاءِ قانوني ترميم ڪئي وڃي.سنڌ هاءِ ڪورٽ ۾ ارسا جي قيام ۽ نون ڪينالن جي تعمير لاءِ پاڻي جي دستيابي سرٽيفڪيٽ جاري ڪرڻ خلاف درخواست جي ٻڌڻي ٿي،ٻڌڻي دوران سيڪريٽري ارسا، ايڊووڪيٽ جنرل سنڌ ۽ ايڊيشنل اٽارني جنرل سميت ٻيا عدالت ۾ پيش ٿيا.سنڌ هاءِ ڪورٽ پڇاڻو ڪيو ته ڇا سنڌ مان ڪنهن وفاقي ميمبر کي ارسا ۾ مقرر ڪيو ويو آهي؟، ايڊيشنل اٽارني جنرل جواب ڏنو ته عدالتي حڪم ۾ اهڙي ڪا به هدايت نه هئي.جسٽس فيصل ڪمال عالم چيو ته عدالت جو حڪم اڳ ۾ ئي موجود آهي، اڃا تائين حڪم تي عمل ڇو نه ٿيو آهي؟ ايڊيشنل اٽارني جنرل درخواست ڪئي ته جواب جمع ڪرائڻ لاءِ وقت ڏنو وڃي. سپريم ڪورٽ ۾ اپيل کي فالو اپ نه هجڻ جي ڪري رد ڪيو ويو آهي. ڪجهه عدالتي حڪم ۽ دستاويز گهري رهيا آهن.سنڌ هاءِ ڪورٽ پنهنجي ريمارڪس ۾ چيو ته وقت ڏينداسين پر عدالتي حڪمن تي عمل ڪيو وڃي. توهان موجوده صورتحال کي اسان کان بهتر ڄاڻو ٿا. هن مسئلي کي هڪ ڀيرو ۽ هميشه لاءِ ختم ڪريو. ڇا قومي اتحاد کان وڏي ڪا شيءِ آهي؟ ڇا توهان معاملي جي حساسيت کي سمجهو ٿا؟ درخواستگذار جي وڪيل چيو ته ارسا جو هيڊ ڪوارٽر لاهور کان اسلام آباد منتقل ڪيو ويو آهي.ايڊووڪيٽ جنرل سنڌ چيو ته موجوده جوڙجڪ جي ڪري ارسا جي فيصلي سازي جو اختيار متاثر ٿيو آهي.عدالت ريمارڪس ڏنا ته قومي اتحاد کي بچائڻ ۽ برقرار رکڻ اولين ترجيح هجڻ گهرجي، ۽ اهو ڪو معمولي معاملو ناهي.سيڪريٽري ارسا چيو ته عدالتي فيصلي موجب ميمبر جي مقرري اسان جو اختيار ناهي، هيڊ ڪوارٽر آرڊيننس تحت منتقل ڪيو ويو.درخواستگذار جي وڪيل چيو ته سنڌ جو پاڻي گهٽجي ويو آهي.سنڌ هاءِ ڪورٽ چيو ته اسان هن معاملي تي ڪجهه به نه ڪنداسين، اسان پاڻ کي عدالتي حڪمن تي عمل درآمد تائين محدود رکنداسين. ڇا واهن تي ڪو ڪم ٿي رهيو آهي؟ ايڊيشنل اٽارني جنرل چيو ته عدالتي حڪمن تي عمل ڪندي ڪينالن تي ڪم روڪيو ويو آهي.سنڌ هاءِ ڪورٽ وفاقي حڪومت کي جواب جمع ڪرائڻ لاءِ وقت ڏيندي ٻڌڻي 29 اپريل تائين ملتوي ڪري ڇڏي.
