ڪراچي: شام جي هڪ عدالت اڱاري ڏينهن اڳوڻي حڪمران بشار الاسد کي غيرحاضري ۾ موت جي سزا ٻڌائي، جڏهن ته کيس ملڪ جي گهرو ويڙهه دوران ”جنگي ڏوهن“ ۽ ”انسانيت خلاف ڏوهن“ جي الزامن ۾ ڏوهي قرار ڏنو ويو.
بشار الاسد ڊسمبر 2024ع ۾ باغين جي دمشق ڏانهن اڳڀرائي دوران پنهنجي خاندان سان گڏ روس جي گاديءَ واري شهر ماسڪو فرار ٿي ويو هو. سندس خلاف ٻڌايل فيصلو عبوري اختيارين جي دور ۾ پهريون اهڙو فيصلو آهي، جن هن سال اڳوڻي حڪومت سان لاڳاپيل شخصيتن خلاف، ڪجهه کي عدالت ۾ پيش ڪري ۽ ڪجهه کي غيرحاضري ۾، مقدما هلائڻ شروع ڪيا آهن.
1965ع ۾ ڄاول بشار الاسد 2000ع ۾ پنهنجي والد حافظ الاسد جي وفات کان پوءِ شام جو صدر بڻيو هو.
عراق جنگ ۽ لبنان جي بحران کان متاثر سندس حڪمراني جي شروعاتي دور کان پوءِ، بشار الاسد جي حڪمراني جي سڃاڻپ آخرڪار گهرو ويڙهه بڻجي وئي. اها گهرو ويڙهه 2011ع جي عرب بهار جي احتجاجن مان شروع ٿي، جڏهن جمهوريت جو مطالبو ڪندڙ شامي شهري روڊن تي نڪري آيا، پر کين طاقت جي استعمال ۽ خونريزي سان منهن ڏيڻو پيو.
اڳوڻي سرڪاري اهلڪار کي به موت جي سزا
شامي عدالت بشار الاسد جي دور جي هڪ اڳوڻي سرڪاري اهلڪار عاطف نجيب کي پڻ ”انسانيت خلاف ڏوهن“ جي الزام ۾ موت جي سزا ٻڌائي.
نجيب درعا صوبي ۾ سياسي سلامتي واري اداري جو سربراهه هو، ۽ درعا ئي اهو علائقو آهي، جتي 2011ع ۾ شام جي عوامي بغاوت جو آغاز ٿيو هو.
عدالت نجيب کي، جيڪو بشار الاسد جو سئوٽ آهي ۽ گذريل سال جنوري ۾ گرفتار ڪيو ويو هو، قتل سميت مختلف ڏوهن ۾ ڏوهي قرار ڏنو. انهن ۾ 15 سالن کان گهٽ عمر جي ٻارن جو ڄاڻي واڻي قتل ۽ اهڙو تشدد جنهن جي نتيجي ۾ موت واقع ٿيو پڻ شامل آهن.
عدالت چيو ته مٿس لاڳو ڪيل عمل ”انسانيت خلاف ڏوهه“ آهن ۽ کيس ”سخت ترين سزا، يعني موت جي سزا“ ٻڌائي ٿي.
تبصرے بند ہیں۔