ڪراچي: آمريڪي نائب صدر جي ڊي وينس چيو آهي ته اسرائيلي حڪومت جي ڪجهه ميمبرن آمريڪا جي عوامي راءِ تي اثرانداز ٿيڻ جي ڪوشش ڪئي، جيئن آمريڪا ۽ ايران وچ ۾ جنگ ختم ڪرائڻ واري معاهدي جي مخالفت ڪرائي وڃي.
هن اها ڳالهه ميزبان جو روگن سان پنهنجي پوڊڪاسٽ جي ان قسط ۾ ڪئي، جيڪا اربع ڏينهن جاري ڪئي وئي. وينس جا اهي بيان اسرائيلي حڪومت جي پاليسين تي سندس اڳوڻي تنقيد جو تسلسل آهن.
ڪيترائي مبصر کيس مستقبل ۾ آمريڪي صدارتي چونڊن لاءِ امڪاني اميدوار طور ڏسن ٿا، ۽ سندس بيانن سان آمريڪا ۽ اسرائيل جي وچ ۾ وڌندڙ عوامي اختلاف به نمايان ٿي رهيا آهن.
وينس گذريل مهيني ايران سان جنگ ختم ڪرڻ لاءِ ٿيل معاهدي جو دفاع ڪيو. آمريڪا ۽ اسرائيل ۾ ان معاهدي جي ناقدن جو چوڻ آهي ته اهو ايران جي ميزائل پروگرام کي محدود ڪرڻ ۾ ناڪام رهيو، ان جي ايٽمي تنصيبات ختم ڪرڻ لاءِ ڪو واضح رستو به پيش نه ڪيو، جڏهن ته لبنان ۾ حزب الله خلاف اسرائيل جي فوجي ڪارروائين کي به محدود ڪري ڇڏيو.
وينس چيو: “مون کي مڪمل يقين آهي ته اسرائيلي حڪومت جي اندر اهڙا ماڻهو موجود آهن، جيڪي اسان کي ان پاليسي کان هٽائڻ جي ڪوشش ڪري رهيا هئا، ڇاڪاڻتہ هو فوجي مهم جاري رکڻ چاهين ٿا.”
نائب صدر وڌيڪ چيو ته جيتوڻيڪ سندس اسرائيلي حڪومت جي ڪجهه ميمبرن سان “سٺا لاڳاپا” آهن، پر: “انهن جي نظام اندر ڪجهه ماڻهو اهڙا آهن، جن بابت اسان کي مڪمل يقين آهي ته هو آمريڪي عوامي راءِ تي اثرانداز ٿيڻ ۽ ان کي تبديل ڪرڻ جي ڪوشش ڪري رهيا آهن، ته جيئن جنگ اڻڄاتل عرصي تائين جاري رهي.”
وينس چيو ته ڪيترائي ملڪ، چاهي آمريڪا جا اتحادي هجن يا مخالف، آمريڪي پاليسين تي اثرانداز ٿيڻ جي ڪوشش ڪندا آهن.
هن چيو: “مون کي ان ڳالهه سان ڪا تڪليف ناهي ته اسرائيل اهڙي ڪوشش ڪري ٿو. سچ پڇو ته مون کي ان ڳالهه سان به ڪو مسئلو ناهي ته روس يا ٻيا ڪجهه ملڪ به اهڙيون ڪوششون ڪن ٿا.”
هن وڌيڪ چيو: “2026ع ۾ سياسي اڳواڻ هجڻ جي فطرت ئي اهڙي آهي.” تنهن هوندي به وينس چيو: “جيڪا ڳالهه مون کي پريشان ڪري ٿي، اها اها آهي ته جڏهن اهڙيون اثرانداز ٿيڻ واريون مهمون حقيقت ۾ آمريڪا جي سياسي فيصلي سازي تي اثر وجهن.”
وينس جون مهيني ۾ به ايران سان ٿيل معاهدي تي تنقيد ڪندڙ اسرائيلي حلقن تي سخت تنقيد ڪئي هئي. هن چيو هو ته صدر ڊونلڊ ٽرمپ ئي اسرائيل جو واحد حقيقي اتحادي آهي، ۽ ان حوالي سان هن آمريڪا پاران اسرائيل کي ملندڙ اربين ڊالرن جي دفاعي امداد جو به حوالو ڏنو هو.
ٻئي طرف اسرائيل جي سينيئر عملدارن، جن پنهنجا نالا ظاهر نه ڪرڻ جي شرط تي ڳالهه ڪئي، چيو ته معاهدي جون شرطون اسرائيل لاءِ نقصانڪار آهن، ڇاڪاڻتہ انهن ۾ ايران جي ايٽمي پروگرام ۽ بيلسٽڪ ميزائل پروگرام بابت اسرائيل جا بنيادي خدشا شامل نه ڪيا ويا. سندن چوڻ هو ته اهو موقف اسرائيل جي سڄي قيادت ۾ گڏيل طور موجود آهي.
جڏهن وينس کان پڇيو ويو ته ڇا جيڪڏهن اسرائيل جو اثر نه هجي ها ته آمريڪا ايران سان تازي جنگ ۾ شامل ٿئي ها، ته هن جواب ڏنو:
“ها، ها، منهنجو خيال آهي ته نه ٿئي ها.” وينس وڌيڪ چيو: “منهنجو خيال آهي ته صدر، اسرائيل جي ڪنهن به اثر کان الڳ، اهو پختو يقين رکي ٿو ــ ۽ مان به ان سان متفق آهيان ــ ته ايران کي ڪڏهن به ايٽمي هٿيار حاصل نه ٿيڻ گهرجن.”
هن خبر تي تبصرو وٺڻ لاءِ جڏهن اسرائيلي وزيراعظم جي آفيس سان رابطو ڪيو ويو ته فوري طور تي ڪو به جواب نه ملي سگهيو.
تبصرے بند ہیں۔