نيو يارڪ: ايلن مسڪ جي اي آءِ چيٽ بوٽ گروڪ ايڪس (ايڪس) جي مفت ۾ويڊيو يا تصويرون ٺاهڻ واريون سهولتون بند ڪري ڇڏيون آهن. اهو فيچر ان ڪري بند ڪري ڇڏيو آهي جو عورتن ۽ ٻارن جون جنسي نوعيت واريون ڊيپ فيڪ تصويرون ٺاهڻ بابت سخت ردعمل سامهون اچي رهيو هو.
ايلن مسڪ جي ملڪيت ۽ xAI پاران تيار ڪيل گروڪ جون تصوير ٺاهڻ ۽ ايڊيٽ ڪرڻ وارا اوزار سوشل ميڊيا پليٽ فارم ايڪس تي تنقيد جي ور چڙهي ويا هئا، جڏهن صارفين خدشن جو اظهار ڪيو ته چيٽ بوٽ عورتن ۽ ٻارن جون اگهاڙيون تصويرون ٺاهي رهيو آهي.
مسڪ کي ڏنڊ لڳائڻ جون ڌمڪيون به مليون آهن، ۽ ڪيترن ئي ملڪن تازو ئي هن اوزار خلاف کلي طرح اعتراض به ڪيو آهي، ڇاڪاڻته اهو جنسي طور کليل تصويرون تيار ڪري رهيو هو.
ايڪس تي صارفين کي جواب ڏيندي گروڪ پوسٽ ڪيو: “تصوير ٺاهڻ ۽ ايڊيٽ ڪرڻ جا فيچر هن وقت صرف پيسا ادا ڪندڙ سبسڪرائبرن تائين محدود آهن. اهي فيچر کولڻ لاءِ سبسڪرپشن وٺو.”
هن تبديلي کان پوءِ هن فيچر جا ڪيترائي صارف هاڻي اي آءِ ذريعي تصويرون ٺاهڻ يا ايڊيٽ ڪرڻ جي قابل نه رهيا آهن. ادا ڪندڙ صارفين کي پليٽ فارم کي پنهنجو ڪريڊٽ ڪارڊ ۽ ذاتي ڄاڻ مهيا ڪرڻي پوندي.
يورپي ڪميشن هن هفتي چيو ته اگهاڙين عورتن ۽ ٻارن جون تصويرون غيرقانوني آهن، ۽ خميس ڏينهن ايڪس کي حڪم ڏنو ته 2026 جي آخر تائين گروڪ سان لاڳاپيل سمورا اندروني دستاويز ۽ ڊيٽا محفوظ رکي.
برطانيا جي وزيراعظم ڪيئر اسٽارمر چيو ته ايڪس کي “هن معاملي تي سخت ڪنٽرول ڪرڻو پوندو”، ۽ ميڊيا رپورٽن موجب هن رابطي واري ريگيوليٽر آفڪام کي چيو آهي ته “سڀ آپشن ميز تي رکيا وڃن”. هن تصويرن کي “غيرقانوني” قرار ڏيندي چيو ته برطانيا “اهڙي شيءِ برداشت نه ڪندو”. فرانس، ملائيشيا ۽ ڀارت به هن معاملي تي مسڪ جي پليٽ فارم تي تنقيد ڪئي آهي.
“جيڪو به گروڪ استعمال ڪري غيرقانوني مواد ٺاهيندو، ان سان ساڳيو سلوڪ ڪيو ويندو، ڄڻ هن غيرقانوني مواد اپلوڊ ڪيو هجي،” مسڪ گذريل هفتي ايڪس تي واضح تصويرن بابت هڪ پوسٽ جي جواب ۾ لکيو.
ان کان پوءِ ايڪس جي سرڪاري “سيفٽي” اڪائونٽ چيو ته ايڪس تي غيرقانوني مواد سان “ان کي هٽائڻ، اڪائونٽس مستقل طور معطل ڪرڻ، ۽ ضرورت پوڻ تي مقامي حڪومتن ۽ قانون لاڳو ڪندڙ ادارن سان سهڪار ڪرڻ” ذريعي نبيرو ڪيو ويندو آهي.
هاڻي ايڪس تي تصوير ٺاهڻ وارا فيچر استعمال ڪرڻ لاءِ سبسڪرپشن ضروري آهي، جيڪي شروعات ۾ روزاني حدن سان مفت مهيا ڪيا ويا هئا. البته، صارفين گروڪ جي الڳ ايپ تي تصوير ٺاهڻ ۽ ايڊيٽ ڪرڻ جا فيچر اڃا تائين مفت استعمال ڪري سگهن ٿا. ڊسمبر 2025 ۾ ايڪس تي تڪرار تڏهن پيدا ٿيو هو، جڏهن ظاهر ٿيو ته صارفين گروڪ جا اوزار استعمال ڪري تصويرن ۾ ڦيرڦار ڪري رهيا آهن، جن ۾ ماڻهن کي ڊجيٽل طور اگهاڙو ڏيکارڻ، ٻارن کي به شامل ڪندي، يا کين نهايت گهٽ ڪپڙن جهڙوڪ بيڪني ۾ پيش ڪرڻ شامل هو.
رائٽرز، بي بي سي ۽ ٻين ميڊيا ادارن به ڪيترن ئي اهڙن واقعن جي دستاويزڪاري ڪئي، جتي گروڪ عورتن ۽ نابالغن جون جنسي نوعيت واريون تصويرون تيار ڪيون هيون.
تبصرے بند ہیں۔