لاهور : سپريم ڪورٽ جي جج جسٽس منصور علي شاهه چيو آهي ته اسان ٽرڪ جي بتي پٺيان لڳي پيا آهيون. گذريل 7 سالن ۾ موسمياتي تبديليءَ بابت ڪجهه به نه ڪيو ويو آهي.لاهور ۾ هڪ خانگي يونيورسٽي پاران منعقد ڪيل ٽئين پاٿ ويز ٽو ڊولپمينٽ ڪانفرنس کي خطاب ڪندي هن چيو ته ڪلائميٽ فنانس ڪلائميٽ جسٽس آهي.جسٽس منصور علي شاهه جو چوڻ آهي ته پاڪستان موسمياتي ايمرجنسي کي منهن ڏئي رهيو آهي، پاڪستان موسمي تبديلين کان متاثر دنيا جو اٺون وڏو ملڪ آهي، عدالتن هميشه موسمياتي ايمرجنسي ڪيسن کي سنجيدگي سان ورتو آهي.هن چيو ته فوڊ سيڪيورٽي، ڊزاسٽر مئنيجمينٽ، واٽر سڪيورٽي سميت ٻين عنصرن تي غور ڪرڻ جي ضرورت آهي، شهري رٿابندي ۽ زرعي رٿابندي تي ڳالهه ٻولهه ٿيڻ گهرجي، موسمياتي انصاف شروع ڪيو وڃي.سپريم ڪورٽ جي جج جو چوڻ آهي ته عدالتن ڪيسن ۾ هدايتون ڏنيون پر زمين تي ڪجهه نه ٿيو، اهو ناهي ڏٺو ويو ته وسيلا آهن يا نه، حڪومت به ان تي ڌيان نه ڏنو.ڪلائيميٽ فنانس پاڪستان ۾ اميد جي هڪ کرن ثابت ٿيندو، ان سان عوام کي تحفظ ملندو، ڪلائيميٽ فنانس موسمياتي انصاف فراهم ڪري سگهندو، آئيني طور انساني حقن جي تحفظ لاءِ به اسان کي ڪلائميٽ فنانس ڏانهن وڃڻو پوندو.اسان کي موسمياتي ايمرجنسي لاءِ هڪ مربوط حڪمت عملي ٺاهڻي آهي، اسان وٽ انتظامي مسئلا آهن، باڪو ۾ حڪومت سٺو ڪم ڪيو آهي، موسمياتي سفارتڪاري کي جلدي ڪرڻ جي ضرورت آهي، حڪومت وٽ هن وقت ڪافي پئسو نظر نٿو اچي.قانون 2017ع ۾ ٺاهيو ويو پر اٿارٽي اڃا نه ٺهي سگهي آهي، جلد ٺهي سگهي ٿو، ڪلائميٽ فنڊ اڃا نه ٺهي سگهيو آهي، فنڊ ايڪٽ موجب بڻجڻو هو، بجيٽ ۾ ان جو ذڪر به ناهي ڪيو ويو. عدالتون سمجهن ٿيون ته ڪلائميٽ فنانس کي بنيادي حق سمجهيو وڃي، اهو هڪ بنيادي انساني حق آهي، فطرت جي فنانس کي سمجهڻو پوندو ته جيئن آلودگي ۽ حياتياتي تنوع کي به منهن ڏئي سگهجي.
