ڪوئيٽا: بلوچستان حڪومت جي ترجمان شاهد رند چيو آهي ته بلوچستان نيشنل پارٽي(بي اين پي) ريڊ زون ۾ احتجاج ڪرڻ چاهي ٿي پر انهي کي اجازت نه ڏني ويندي.
بلوچستان حڪومت جي ترجمان شاهد رند ڪوئٽه ۾ پريس ڪانفرنس ڪندي چيو ته سردار اختر مينگل سان گڏ حڪومتي ڪميٽي 2 ويهڪون ڪيون آهن، صوبائي حڪومت کيس سرياب روڊ تي جڳهه جي آڇ ڪئي پر بي اين پي ريڊ زون ۾ احتجاج ڪرڻ چاهي ٿي انهي جي اجازت نه ڏني ويندي.
شاهد رند چيو ته بي اين پي ڪوئٽه طرف لانگ مارچ جو اعلان ڪري چڪي آهي، قلم 144 لاڳو آهي، جيڪڏهن ڀڃڪڙي ڪئي وئي ته قانون حرڪت ۾ ايندو. هن چيو ته اسان هن وقت به صبر جو مظاهرو ڪري رهيا آهيون، صوبائي حڪومت جي ڪوشش اها هئي ته سياسي ڊائيلاگ سان معاملي کي حل ڪيو وڃي. ٻنهي طرفن کان لچڪ ڏيکارڻي پوندي. جيڪڏهن اختر مينگل ضد تي رهيو ته حڪومت وٽ ٻيا آپشن به موجود آهن.
ياد رهي ته گذريل ڪجهه ڏينهن اڳ سردار اختر مينگل جي اڳواڻي ۾ بي اين پي جو لانگ مارچ وڊهه کان شروع ٿيو هو پر مستونگ جي هنڌ تي رستا بند هجڻ تي اتي ئي ڌرڻو هنيو ويو هو جيڪو اڄ نائين ڏينهن ۾ داخل ٿي چڪو آهي