اسلام آباد: عالمي بينڪ پاڪستان لاءِ 10 ڪروڙ 20 لک ڊالر قرض جي منظوري ڏئي ڇڏي آهي. عالمي بينڪ طرفان پاڪستان جي لاءِ منظور ڪيل رقم موسمياتي تبديلي سبب متاثر غريب آبادگارن جي لاءِ هوندي. انهي رقم مان موسمياتي تبديلي سبب متاثر ماڻهن کي ننڍا قرض ڏنا ويندا.
عالمي بينڪ طرفان جاري ڪيل پڌرائي ۾ چيو ويو آهي ته رقم جو مقصد موسمياتي تبديلين سبب متاثر ماڻهن جي آمدني وڌائڻ آهي. رقم عالمي بينڪ جي 10 ساله ڪنٽري پارٽنر شپ پروگرام جو حصو آهي.
پڌرائي ۾ چيو ويو آهي ته منصوبو ننڍي ڪاروبارن ۽ ڏوراهين علائقن ۾ مالياتي شموليت وڌائڻ ۾ مدد ڏيندو. ورلڊ بينڪ جي ڪنٽري ڊائريڪٽر جو چوڻ آهي ته مائيڪرو فنانس غريب طبقي جي مالي مدد لاءِ هڪ اهم ذريعو آهي. انهي منصوبي سان 10 لک عورتن سميت 18 لک 90 هزار ماڻهو فائدو حاصل ڪري سگهندا.
ورلڊ بينڪ جي ڪنٽري ڊائريڪٽر موجب پاڪستان ۾ ورلڊ بينڪ جي تعاون سان 54 منصوبا جاري آهن. پاڪستان ۾ عالمي بينڪ جي ٽوٽل سرمائيڪاري 15.7 ارب ڊالر تائين پهچي وئي آهي.