واشنگٽن: آءِ ايم ايف جي مئنيجنگ ڊائريڪٽر ڪرسٽيلنا جارجيوا اميد ظاهر ڪئي آهي ته پاڪستان پنهنجو موجوده پروگرام ڪاميابي سان مڪمل ڪندو ۽ اهو سريلنڪا ۽ گهانا جهڙي صورتحال کي منهن نه ڏيندو.
واشنگٽن ۾ پريس ڪانفرنس ڪندي ڪرسٽيلنا جارجيوا چيو ته پاڪستان جن معاملن تي اتفاق ڪيو آهي، انهن تي عمل سان پروگرام مڪمل ڪري سگهي ٿو.
هن چيو ته پاڪستاني اختيارين سان گڏجي وڏي محنت سان ڪم ڪري رهيا آهيون، پاڪستان اهڙو پاليسي فريم ورڪ ٺاهي، جنهن سان معاشي خطرا ٽري وڃن.
سندس چوڻ هو اسان چاهيون ٿا ته پاڪستان پائيدار معاشي ترقي ڏانهن وڌي، اسان پاڪستان کان هن وقت عالمي مالي سپورٽ جي خاطري چاهيون ٿا.
ڪرسٽيلنا جارجيوا موجب ان ۾ ڪو شڪ ناهي ته پاڪستان موسمياتي تبديلي جي چئلينجن کي منهن ڏئي رهيو آهي پر پاڪستان جيڪي قدم کڻي رهيو آهي، ان مان اميد آهي ته پروگرام ڪاميابي سان مڪمل ٿي ويندو.