اڄ کان زوردار برساتن جي اڳڪٿي، ڪٿي ڪٿي پهاڙ کسڪڻ ۽ گليشئر ڦاٽڻ جو خدشو

اسلام آباد: موسميات کاتي پاران ملڪ جي مختلف حصن ۾ اڄ کان 2 سيپٽمبر تائين زوردار برساتن جي اڳڪٿي ڪري ڇڏي آهي.

موسميات کاتي موجب 29 کان 31 آگسٽ تائين ملتان، ڊي جي خان، راجن پور، لئيه، ڀکر، ساهيوال، بهاولپور، بهاولنگر ۽ رحيم يار خان ۾ برساتن سبب نشيبي علائقا پاڻي هيٺ اچڻ جو امڪان آهي.

ان کان علاوه 30 ۽ 31 آگسٽ دوران راولپنڊي، اٽڪ، جهلم، چڪوال، لاهور، گوجرانوالا، سياهوال، گجرات ۽ نارووال ۾ زوردار برساتن جو امڪان آهي، جنهن سبب علائقن ۾ وهڪرا وهي وڃڻ ۽ سيلابي صورتحال پيدا ٿيڻ جو خدشو آهي.

ٻئي پاسي پنجاب ۾ اڳ ئي سيلابي تباهڪارين سبب سوين وسنديون پاڻي ۾ ٻڏي ويون آهن، جڏهن ته هزارين ماڻهو بي گهر ٿي پيا آهن، ۽ ڳانڍاپي جو نظام درهم برهم ٿي ويو آهي.

محڪمي اڳڪٿي موجب خيبر پختونخوا ۾ به 29 کان 31 آگسٽ دوران شديد برساتون پونديون، جڏهن ته مالاڪنڊ ۽ هزارا ڊويزن، آزاد ڪشمير ۽ گلگت بلتستان ۾ پهاڙ کِسڪڻ ۽ گليشيائي ڍنڍون ڦاٽڻ جا خدشا آهن.

ساڳئي وقت سنڌ جي ڪراچي، ٺٽو، سجاول، بدين ۽ ٿرپارڪر ۾ برساتن سبب سيلابي صورتحال پيدا ٿي سگهي ٿي، جڏهن ته بلوچستان جي مختلف علائقن ۾ پهاڙ کسڪڻ جا امڪان آهن.