ممبئي : بالي ووڊ اداڪارا سوارا ڀاسڪر غزه ۾ اسرائيل جي ظالمانه ظلمن ۽ ناانصافين ۽ تازو النصر اسپتال تي حملي تي پنهنجي خاموشي ٽوڙي ڇڏي آهي جنهن ۾ هڪ صحافي ۽ ٻين کي جيئرو ساڙيو ويو هو،انسٽاگرام تي پنهنجي ڌيءَ سان هڪ تصوير شيئر ڪندي، سوارا ڀاسڪر هڪ جذباتي پوسٽ ۾ پنهنجن خيالن جو اظهار ڪيو. سوارا ڀاسڪر لکيو ته، “مان تمام گهڻي ڪوشش ڪريان ٿي ته سٺو لباس پائيان، ميڪ اپ ڪريان ۽ سيلفي پوسٽ ڪريان، پنهنجي ڌيءَ جون خوبصورت تصويرون ڪڍان ۽ ريل تي ميڪ اپ ڪريان، پنهنجي ۽ پنهنجي خاندان جون تصويرون پوسٽ ڪريان، پر اهو سڀ ڪجهه به مون کي (غزه بابت سوچڻ کان) روڪي نٿو سگهي.پنهنجي پوسٽ ۾، اداڪاره غزه ۾ ٿيندڙ وحشتن تي افسوس جو اظهار ڪندي لکيو ته، “هر روز مان والدين کي پنهنجي مئل ٻار کي پنهنجي هٿن ۾ کڻي روئندي ڏسان ٿي، هڪ ٻار جنهن جو مٿو جسم کان ڪٽيل آهي ۽ جنهن جي جسم جا حصا اسرائيلي بمباري سان هوا ۾ اڏامي ويا آهن، ماڻهو پنهنجن پيارن جا عضوا پلاسٽڪ جي ٿيلهين ۾ کڻي وڃي رهيا آهن، جڏهن ته هڪ شخص کي جيئرو ساڙيو ويو آهي.”سوارا ڀاسڪر لکيو ته اسين سڀ هڪ نسل ڪشي ڏسي رهيا آهيون، اهي بدترين جنگي ڏوهن ۽ غير انساني ظلمن کي اسان جي فونن تي لائيو اسٽريم ڪيو پيو وڃي ۽ اسان ڪجهه به ڪرڻ جي قابل نه آهيون، اسان سڀ آهستي آهستي مري رهيا آهيون، اسرائيل صرف غزه کي تباهه نه ڪري رهيو آهي ۽ فلسطين ۾ قتل ۽ معذوري ڪري رهيو آهي، اهو اسان جي انسانيت کي ختم ڪري رهيو آهي. گهري ڏک جو اظهار ڪندي، اداڪاره وڌيڪ لکيو، “اهو عام ناهي. انسانن يا ڪنهن به جاندار کي جيئرو ساڙڻ عام ناهي. ٻارن کي مارڻ ۽ اسپتالن، اسڪولن ۽ عام ماڻهن تي بمباري ڪرڻ پڻ عام ناهي. مغربي دنيا جيڪي جنگيون ٺاهيون، انهن جا هٿيار ٺاهيا ۽ نسل ڪشي، اهو سڀ ڪجهه عام ناهي. سوارا ڀاسڪر ماڻهن کي هن ظلم ۽ ناانصافي خلاف آواز بلند ڪرڻ جي اپيل ڪندي لکيو ته، “دنيا جي سڀ کان خوفناڪ جنگي ڏوهن تي اکيون بند نه ڪريو ۽ نسل ڪشي خلاف آواز بلند ڪريو.”