منڊالَي: ميانمار ۾ زلزلي کان سڀ کان وڌيڪ متاثر ٿيل شهر منڊالي ۾ ريسڪيو جي عملي پنجين ڏينهن هڪ شخص کي زندهه بچائي ورتو آهي. جمعي تي آيل 7.7 شدت وارو زلزلو، ميانمار ۾ 0ڏي تباهي مچائي هئي. ميانمار جي سرڪاري ٽيليويزن MRTV موجب، گذريل هفتي جي زلزلي سبب فوتين جو انگ وڌي 2,886 ٿي ويو. MRTV پنهنجي ٽيليگرام چينل تي ٻڌايو ته 4,639 ماڻهو زخمي ۽ 373 ماڻهو لاپتا آهن. ڪجهه اهم هٿياربند گروهن، جيڪي حڪومت خلاف جنگ وڙهي رهيا آهن، زلزلي کانپوءِ پنهنجي جنگبندين جو اعلان ڪيو آهي پر فوجي حڪومت سربراهه مِن آنگ هلاينگ چيو ته رياستي فوجي ڪارروايون جاري رهنديون، جيتوڻيڪ عالمي سطح تي ميانمار تي هوائي حملن جي تنقيد ٿي رهي آهي. گڏيل قومن جي ايجنسين، انساني حقن جي تنظيمن ۽ پرڏيهي حڪومتن ميانمار جي سڀني ڌرين تي زور ڀريو آهي ته وڙهڻ بند ڪن ۽ زلزلي کان متاثر ٿيل ماڻهن جي مدد تي ڌيان ڏين، جيڪو ڏهاڪن کانپوءِ ملڪ ۾ سڀ کان وڏو زلزلو هو. باقي بچيل ماڻهن کي زندهه ڳولڻ جون اميدون گهٽ ٿي رهيون آهن، پر اربع ڏينهن هڪ خوشي جو لمحون ڏسڻ ۾ آيو جڏهن نيپيادو جي هڪ هوٽل جي کنڊرن مان هڪ شخص کي زندهه ڪڍيو ويو. 26 سالن جو هوٽل ملازم ميانمار-ترڪي جي گڏيل ٽيم طرفان کيس زنده ڪڍيو ويو، جنهن جي تصديق فائر سروس ۽ جنتا ڪئي. ريسڪيو ٿيل شخص، جيڪو ڌوڙ سان ڍڪيل هو، پر هوش ۾ هو، کيس ملبي مان سوراخ ذريعي ڪڍي اسٽريچر تي رکيو ويو، جنهن جو وڊيو ميانمار فائر سروسز ڊپارٽمينٽ فيس بڪ تي به پوسٽ ڪيو. ياد رهي ته پاڪستان امدادي سامان سان ڀريل 2 جهاز ينگون روانا ڪيا هئا جن ۾ 70 ٽن امدادي سامان هو. جن ۾ خيما، ڪمبل، ترپال، کاڌو ۽ دوائون شامل هيون.