اسلام آباد: اسلام آباد هاءِ ڪورٽ پي ٽي آءِ باني عمران خان سان هفتي ۾ 2 ڏينهن اڱاري ۽ خميس جي ملاقات بحال ڪري ڇڏي آهي، جڏهن ته صحافين سان ڳالهيون نه ڪرڻ جو حڪم پڻ ڏنو ويو آهي. اسلام آباد هاءِ ڪورٽ حڪم جاري ڪيو آهي ته جيڪو به پي ٽي آءِ باني سان ملاقات ڪندو اهو صحافين سان نه ڳالهائيندو، جڏهن ته عمران خان جو ڪوآرڊينيٽر سلمان اڪرم راجه جيڪي نالا ڏيندو صرف اهوئي ملاقات ڪري سگهندو.
پي ٽي آءِ باني جي جيل ملاقاتن بابت درخواستن تي ٻڌڻي وقتي چيف جسٽس سرفراز ڊوگر، جسٽس ارباب محمد طاهر ۽ جسٽس محمد اعظم تي ٻڌل لارجر بينچ ڪئي.
اڊيالا جيل سپرنٽينڊنٽ جي وڪيل عدالت کي ٻڌايو ته ڊسمبر تائين ساڳئي ايس او پيز جي تحت جيل ملاقاتون ڪرايون پئي ويون، جنوري کان پوءِ اسٽيٽس تبديل ٿيو، سيڪيورٽي ٿريٽس هئا، وڪيل چيو ته جيل مينوئل موجب پي ٽي آءِ باني جي اڱاري جي ڏينهن ملاقاتون ڪرائي رهيا هئاسين جنوري کان پوءِ پي ٽي آءِ باني جو اسٽيٽس انڊر ٽرائل قيدي کان سزا يافته قيدي بڻجي ويو.
وقتي چيف جسٽس چيو ته هر ماڻهو درخواست کڻي ايندو آهي منهنجي به جيل ۾ ملاقات ڪرائي وڃي. جنهن تي جيل سپرنٽينڊنٽ جي وڪيل چيو ته هي جيل ملاقاتن کي سياسي مقصدن جي لاءِ استعمال ڪندا آهن. جسٽس ارباب محمد طاهر ريمارڪس ڏنا ته اپيل ۾ اڱاري ۽ خميس جي ملاقات جون ايس او پيز طئي ٿيون هيون. جنهن تي وڪيل نويد ملڪ چيو ته سيڪيورٽي ٿريٽس جي ڪري اسان 2 ڏينهن جي بجاءِ اڱاري تي ئي 2 ملاقاتون مقرر ڪيون هيون، جيل رولز موجب سپرنٽينڊٽ اڊياله جيل جو اختيار آهي، اهڙي صورتحال ۾ رولز موجب سپرنٽينڊنٽ ملاقات طئي ڪندو آهي.
سلمان اڪرم راجه چيو ته اسان جي استدعا آهي ته هفتي ۾ 2 ملاقاتن جو سلسلو بحال ڪيو وڃي، جنهن تي جيل سپرنٽينڊنٽ جي وڪيل چيو ته ٻن ڏينهن جي لاءِ مينيج ڪرڻ مشڪل هوندو آهي، اسان هڪ ڏينهن ئي سموريون ملاقاتون ڪرائي رهيا آهيون.
وقتي چيف جسٽس چيو ته جيل ملاقاتن جي 100 کان وڌيڪ پٽيشنون داخل ٿيون جن مان 98 اڪلايون ويون آهن، اسان چاهيون ٿا ته انهي معاملي کي لارجر بينچ هڪ ڀيرو ئي اڪلائي ڇڏي. چيف جسٽس اسلام آباد هاءِ ڪورٽ جو چوڻ هو ته جيل ملاقات کان پوءِ ميڊيا ٽاڪ جي ڪهڙي ضرورت آهي؟ هي ملاقات ڪري هليا ويندا هنن کان انڊر ٽيڪنڪ وٺي ٿا ڇڏيون ته جيل ملاقات کان پوءِ صحافين سان ڳالهه ٻولهه نه ڪئي ويندي.
اسلام آباد هاءِ ڪورٽ عمران خان جي جيل ۾ اڱاري ۽ خميس تي ملاقات بحال ڪرڻ جو حڪم جاري ڪندي چيو ته پي ٽي آءِ باني جو ڪوآرڊينيٽر جيڪي نالا ڏيندو صرف اهي ئي ملاقات ڪري سگهندا، پي ٽي آءِ باني سان ملاقات کان پوءِ صحافين سان ڳالهه ٻولهه نه ڪئي ويندي، جيڪو به پي ٽي آءِ باني سان ملندو اهو ميڊيا سان نه ڳالهائيندو