سکر: نيب ڪڻڪ خريداري ۾ مبينه ڪرپشن تي خوراڪ کاتي سنڌ جي آفيسرن کي رڪارڊ سميت طلب ڪري ورتو آهي.
نيب طرفان جاري ڪيل نوٽيفڪيشن ۾ خوراڪ کاتي سنڌ جي اڳوڻي سيڪريٽري خرم شهزاد عمر، اڳوڻي ڊائريڪٽر امداد شاهه ۽ مختلف ضلعن ۾ مقرر ڊي ايف سيز کي 21 مارچ تي نيب آفيس سکر طلب ڪيو ويو آهي.
اهڙن آفيسرن تي ڪڻڪ خريداري جي مد ۾ مبينه ڪرپشن ڪرڻ ۽ ڪڻڪ غائب ڪرڻ جو الزام آهي. انهي کان علاوه ميرپورخاص، لاڙڪاڻو، سکر، حيدرآباد ۽ شهيد بينظير آباد ڊويزن مان خريد ڪيل ڪڻڪ جو رڪارڊ به طلب ڪيو ويو آهي.
خوراڪ کاتي کان سال 23-22-2021 ۽ 24 ۾ خريد ڪيل ڪڻڪ جو رڪارڊ گهريو ويو آهي ۽ موجوده ذخيرو ڪيل ڪڻڪ جو رڪارڊ به طلب ڪيو ويو آهي.
ياد رهي ته سنڌ جي خوراڪ کاتي وياج تي بينڪن کان قرض کڻي اربين روپين جي ڪڻڪ خريد ڪئي هئي ۽ ڪڻڪ خريداري تي اڳ ئي 90 ارب روپين جو نقصان ٿيڻ جو انڪشاف ٿيو آهي. 90 ارب روپين جي نقصان جو انڪشاف ناڻي کاتي طرفان سنڌ حڪومت ڏانهن اماڻيل سمري ۾ ڪيو ويو هو.