واشنگٽن : آمريڪي صدر جو بائيڊن طرفان 2024ع جي صدارتي چونڊن جي ڊوڙ تان هٿ کڻڻ تي سندس مخالف اميدوار ڊونلڊ ٽرمپ جو ردعمل سامهون آيو آهي.
اڳوڻي آمريڪي صدر ڊونلڊ ٽرمپ مقامي ميڊيا سان ڳالهائيندي بائيڊن کي آمريڪي تاريخ جو اڪيلو بدترين صدر قرار ڏنو.
اِهو واضح ناهي ته بائيڊن کانپوءِ ڊيموڪريٽس طرفان ڪهڙو اميدوار ميدان ۾ لاٿو ويندو، پر ٽرمپ جو چوڻ آهي ته نائب صدر ڪاملا هيرس کي صدارتي چونڊن ۾ شڪست ڏيڻ بائيڊن جي مقابلي ۾ وڌيڪ سولو هوندو.
ان کانپوءِ پنهنجي سوشل ميڊيا سائيٽ ٽرٿ سوشل تي ان حوالي سان جاري ڪيل بيان ۾ ٽرمپ بائيڊن کي بدديانت قرار ڏيندي چيو ته جو بائيڊن صدر ٿيڻ جي ڊوڙ ۾ شامل ٿيڻ جو اهل نه هو، هن رڳو ڪوڙ ۽ جعلي خبرن سبب اِهو عهدو حاصل ڪيو، سندس ويجهن ماڻن جن ۾ سندس ڊاڪٽر ۽ ميڊيا جا نمائندا شامل آهن اِهي ڄاڻن پيا ته بائيڊن صدر بڻجڻ جي لائق نه آهي.