ڪراچي: ڪراچي ۾ تازو ٿيندڙ ڌماڪن بابت قانون لاڳو ڪندڙ اداري تجزياتي رپورٽ تيار ڪري ورتي. ڪراچي ۾ ٿيندڙ تازن ڌماڪن بابت قانون لاڳو ڪندڙ اداري جي تجزياتي رپورٽ ۾ اهم انڪشاف سامهون آيا آهن.
رپورٽ موجب ڪراچي ۾ ٿيندڙ آپگهاتي ڌماڪي سميت ٽنهي بم ڌماڪن ۾ ڀارتي ڳجهي ايجنسي(را) ملوث آهي. رپورٽ ۾ ٻڌايو ويو آهي ته ڪراچي جي علائقي صدر ۽ کارادر جي بولٽن مارڪيٽ ڌماڪن ۾ 3 دهشتگرد گروپن هڪ ٻئي جي مدد ڪئي.
رپورٽ موجب متحده لنڊن جي سليپر سيل مان مبينه طور تي علائقي جي ريڪي جو ڪم ورتو ويو. رپورٽ ۾ وڌيڪ ٻڌايو ويو آهي ته ماضي ۾ اهڙي طرح جا بم ٺاهڻ ۽ لڳائي ڌماڪا ڪرڻ جو ڪم پابندي مڙهيل بي ايل اي جو طريقو رهيو آهي
جڏهن ته ايس آر اي به صوبي جي اندروني علائقن ۾ اهڙو ڪم ڪندي رهي آهي. رپورٽ موجب تازن ڌماڪن ۾ بم لڳائڻ ۽ ڌماڪن ۾ پابندي مڙهيل ايس آر اي جي مدد ورتي وئي آهي جڏهن ته ڌماڪن جو مقصد قانون لاڳو ڪندڙ ادارن سان گڏ واپاري علائقن کي به نشانو بنائڻ آهي.