ڪراچي: سينيئر صحافي، اينڪر پرسن ۽ سنڌ جي آواز سمجهيا ويندڙ امتياز مير جي لاڏاڻي تي وائس آف سنڌ ۽ ان جي پراجيڪٽ ڊائريڪٽر ڊاڪٽر عمير هارون گهري ڏُک، افسوس ۽ تعزيت جو اظهار ڪيو آهي.
ڊاڪٽر عمير هارون پنهنجي تعزيت بيان ۾ چيو:
"امتياز مير رڳو صحافي نه هئا، هو هڪ نظريو، هڪ آواز، ۽ حق گوئي جي سڃاڻپ هئا. هن مشڪل ترين حالتن ۾ به صحافتي اصولن تي ڪڏهن به سودو نه ڪيو، ۽ هميشه مظلوم، محروم ۽ ڪمزور طبقي جي ڳالهه ڪئي.”
هن وڌيڪ چيو:
"امتياز مير جو اندازِ صحافت نوجوان صحافين لاءِ مشعلِ راهه آهي. انهن جون تحريرون ۽ تجزيا نه رڳو معلومات ڏيندڙ هئا، پر ماڻهن ۾ شعور به پيدا ڪندا هئا. هو ميڊيا جي اُن ناياب نسل مان هئا جيڪي سچ چوڻ کان نه ڊڄندا هئا، ڀلي ان جي ڪا به قيمت ادا ڪرڻي پئي.”
وائس آف سنڌ طرفان جاري بيان ۾ چيو ويو ته:
"امتياز مير جي کوٽ ڊگهي عرصي تائين محسوس ڪئي ويندي. سندس جدوجهد، حب الوطني، پيشاوراڻي ايمانداري ۽ بهادراڻي صحافت کي هميشه ياد رکيو ويندو.”
ڊاڪٽر عمير هارون وڌيڪ چيو:
"اسين سندن خاندان، ساٿين ۽ سڄي صحافتي برادري جي ڏُک ۾ برابر جا شريڪ آهيون. سندن وڃڻ هڪ ذاتي صدمو لڳي رهيو آهي، ڇو ته هو رڳو رپورٽر نه، پر هن خطي جي ضمير جي آواز هئا.”
آخر ۾ وائس آف سنڌ ۽ ڊاڪٽر عمير هارون دعا ڪئي:
"الله پاڪ امتياز مير کي پنهنجي جوارِ رحمت ۾ بلند مقام عطا فرمائي، سندس مغفرت فرمائي، ۽ وارثن کي صبرِ جميل عطا فرمائي. آمين.”