گلگت : وزيراعظم شهباز شريف جو چوڻ آهي ته گلگت بلتستان ۾ تازي ٻوڏ دوران جاني ۽ مالي نقصان تي افسوس آهي ۽ موسمياتي تبديلي جي چئلينجن کي منهن ڏيڻ لاءِ قدم کڻڻ وقت جي ضرورت آهي.گلگت بلتستان جي وڏي وزير گلبر خان سان ملاقات کان پوءِ گلگت بلتستان ۾ ٻوڏ بابت جائزي اجلاس کي خطاب ڪندي وزيراعظم شهباز شريف چيو ته هو ٻوڏ ۽ ڪڪر ڦاٽڻ سبب ٿيندڙ نقصان جو جائزو وٺڻ لاءِ گلگت بلتستان آيو آهي.وزيراعظم شهباز شريف چيو ته هو ٻوڏ جي صورتحال سبب جاني ۽ مالي نقصان تي تمام گهڻو افسوس ڪري رهيو آهي ۽ ان حوالي سان گلگت بلتستان حڪومت سان مڪمل رابطي ۾ آهي.هن چيو ته عالمي ڪاربن جي اخراج ۾ اسان جو حصو تمام گهٽ آهي، پر ان جي باوجود، پاڪستان موسمياتي تبديلي کان سخت متاثر ٿيندڙ ملڪن ۾ شامل آهي.هن چيو ته 2022 ۾ آيل ٻوڏ به پاڪستان ۾ تباهي مچائي، اسان هر سال موسمياتي تبديلي کان متاثر ٿي رهيا آهيون.شهباز شريف چيو ته موسمياتي تبديلي جي چئلينجن کي منهن ڏيڻ لاءِ قدم کڻڻ وقت جي ضرورت آهي. موسمياتي تبديلي جي وزارت کي درپيش چئلينجن کي منهن ڏيڻ لاءِ هدايتون ڏنيون ويون آهن.ياد رهي ته وزيراعظم شهباز شريف گلگت بلتستان ۾ تازي ٻوڏ سبب ٿيل نقصان جو جائزو وٺڻ لاءِ گلگت پهچي ويو آهي.گلگت بلتستان حڪومت جي ترجمان فيض الله فراق چيو ته گلگت پهچڻ تي وڏي وزير گلبر خان ۽ گورنر گلگت بلتستان سيد مهدي شاهه سندس استقبال ڪيو. موسمياتي تبديلي جو وفاقي وزير مصدق ملڪ ۽ ٻيا به وزيراعظم سان گڏ گلگت بلتستان پهتا.فيض الله فراق چيو ته وزيراعظم شهباز شريف گلگت بلتستان جي گورنر ۽ وڏي وزير سان ملاقات ڪندو، جڏهن ته لاڳاپيل ادارا وزيراعظم شهباز شريف کي ٻوڏ سبب ٿيندڙ تباهي بابت بريفنگ ڏيندا.گلگت بلتستان حڪومت جي ترجمان جو چوڻ آهي ته وزيراعظم شهباز شريف ٻوڏ ۾ فوت ٿيندڙن جي خاندانن ۾ امدادي چيڪ ورهائيندو.