اسلام آباد: سپريم ڪورٽ فوجي عدالتن کي محفوظ ڪيل فيصلو ٻڌائڻ جي مشروط اجازت ڏئي ڇڏي آهي.سپريم ڪورٽ ۾ فوجي عدالتن جي فيصلي خلاف انٽرا ڪورٽ اپيلن جي ٻڌڻي ٿي، جنهن ۾ اٽارني جنرل منصور عثمان عدالت ۾ پيش ٿيو.اٽارني جنرل عدالت کي ٻڌايو ته ڪل 105 جوابدار فوج جي تحويل ۾ آهن، انهن ۾ 20 اهڙا به آهن جن کي عيد کان اڳ آزاد ڪري سگهجي ٿو. انهن 20 ماڻهن جي آزاديءَ لاءِ 3 مرحلا آهن جن تي عمل ڪرڻو پوندو. بري ڪيو ويو ۽ جن کي سزا گهٽ ڪئي وئي آهي انهن کي رعايت سان آزاد ڪيو ويندو.اٽارني جنرل وڌيڪ چيو ته جوابدارن جي آزاديءَ لاءِ پهريون قدم محفوظ ڪيل فيصلي جو اعلان هوندو، ٻيو قدم ان جي تصديق ۽ ٽيون قدم آرمي چيف طرفان گهٽ سزا وارن کي رعايتون ڏيڻ هوندو.ان دوران اٽارني جنرل فوجي عدالتن کي محفوظ ڪيل فيصلن جي اجازت ڏيڻ جي استدعا ڪئي، جنهن تي عدالت چيو ته جيڪڏهن اجازت ڏني وڃي ته اها اپيلن جي حتمي فيصلي سان مشروط هوندي.عدالت اٽارني جنرل کان پڇاڻو ڪيو ته جن کي آزاد ٿيڻو آهي انهن جا نالا ٻڌايو وڃي، جنهن تي اٽارني جنرل چيو ته فوجي عدالتن مان فيصلا اچڻ تائين هو نالا نٿا ڏئي سگهن، جن جي سزا هڪ سال آهي انهن کي رعايت ڏني ويندي.عدالت چيو ته اٽارني جنرل يقين ڏياريو ته گهٽ سزا وارن کي قانوني رعايتون ڏنيون وينديون، اپيلن تي حتمي فيصلي سان مشروط فيصلو ٻڌائڻ جي اجازت ڏني ويندي.بعد ۾ سپريم ڪورٽ فوجي عدالتن کي محفوظ ڪيل فيصلا ٻڌائڻ جي مشروط اجازت ڏيندي چيو ته فيصلا رڳو انهن ڪيسن ۾ ٻڌايا وڃن جن ۾ نامزد جوابدارن کي عيد کان اڳ آزاد ڪري سگهجي.عدالت اٽارني جنرل کي هدايت ڪئي ته عملدرآمد رپورٽ رجسٽرار کي پيش ڪئي وڃي، ٻڌڻي اپريل جي چوٿين هفتي ۾ ٿيندي.